گلگت بلتستان کو پاکستان کا عبوری صوبہ بنانے کی قرارداد منظور

پاکستان کے زیر انتظام گلگت بلتستان کے اسمبلی نےگلگت بلتستان کو پاکستان کا عبوری صوبہ بنانے کی قرارداد منظور کرلی۔

گلگت بلتستان اسمبلی میں جی بی کو پاکستان کا عبوری صوبہ بنانے کی قرارداد پیش کی گئی جس میں کہا گیا کہ گلگت بلتستان کوعبوری صوبہ بنانےسے مسئلہ کشمیر پر پاکستان کا مؤقف تبدیل نہیں ہونا چاہیے۔

قرارداد میں کہا گیا ہے کہ گلگت بلتستان کو پاکستان کی قومی اسمبلی اور سینیٹ میں نمائندگی دی جائے، جے بی کو پاکستان کے تمام آئینی اداروں میں نمایندگی دی جائے جبکہ وفاقی حکومت گلگت بلتستان اسمبلی کی قرارداد کےنفاذ کےلیےتمام ضروری آئینی، انتظامی اقدامات کرے۔

قرارداد میں کہا گیا کہ گلگت بلتستان کےعبوری صوبہ بننے سے مستقبل میں کشمیر کےاستصواب رائے پر اثر نہیں پڑنا چاہیے، عبوری صوبائی حیثیت سےمسئلہ جموں وکشمیر پرپاکستان کےمؤقف پرکوئی اثرنہیں پڑےگا۔

قرارداد میں گلگت بلتستان کےعوام کو دیگرصوبوں کے برابر آئینی، جمہوری حقوق دینےکی تجویز دی گئی جبکہ قرارداد پرعمل درآمد کےلیےآئینی، قانونی اور انتظامی اقدامات شروع کرنےکی سفارش کی گئی ہے۔

قرارداد کےمطابق عبوری صوبائی حیثیت پاکستان کی بین الاقوامی ذمہ داریوں کے مطابق ہوگی۔

واضح رہے کہ ملک بھر کی طرح گلگت بلتستان میں بھی حالیہ متنازع اور انجینئرڈ الیکشن کا انعقاد پاکستان آرمی کی زیرِ سرپرستی ہوا؛ جس میں ماضی کی روایات برقرار رکھتے ہوئے مقامی سیاستدانوں، قوم پرستوں اور حقیقی عوامی نمائندگان کا راستہ روکنے کے لیے انہیں مختلف مقدمات میں پھنسایا گیا تاکہ وہ الیکشن سے دور رہیں۔ یوں بغیر کسی عوامی تائید اور ووٹ بینک کے من پسند افراد کو جتوایا گیا، جو اب اسمبلی میں اپنی مرضی کے قوانین پاس کر رہے ہیں۔