شوکت نواز میر کی جبری گمشدگی پر اقوامِ متحدہ کے ورکنگ گروپ کی فوری کارروائی

جموں کشمیر ہیومن رائٹس آبزرویٹری (JKHRO) نے شوکت نواز میر کی جبری گمشدگی کے معاملے میں اقوامِ متحدہ کے جبری یا غیر رضاکارانہ گمشدگیوں سے متعلق ورکنگ گروپ (WGEID) کی اہم مداخلت کا خیرمقدم کرتے ہوئے حکومتِ پاکستان سے مطالبہ کیا ہے کہ ان کا مقامِ موجودگی فوری ظاہر کر کے انہیں بااختیار عدالت میں پیش کیا جائے۔

جے کے ایچ آر او کی جانب سے 12 نومبر 2026 کو جاری کردہ اعلامیے کے مطابق، اقوامِ متحدہ کے ورکنگ گروپ کی چیئر-رپورٹیئر محترمہ گرازینا بارانووسکا نے 11 نومبر 2026 کو تنظیم کو ایک سرکاری مراسلے میں تصدیق کی ہے کہ ورکنگ گروپ نے اپنے 140ویں اجلاس کے دوران شوکت نواز میر کے مقدمے (کیس نمبر 10017638، حوالہ نمبر G/SO/217/1/PAK) پر غور کیا اور اسے 23 ستمبر 2026 کو "فوری کارروائی کے طریقۂ کار” (Urgent Action Procedure) کے تحت حکومتِ پاکستان کو ارسال کر دیا ہے۔

مراسلے میں ورکنگ گروپ نے امید ظاہر کی ہے کہ شوکت نواز میر کی قسمت اور مقامِ موجودگی واضح کرنے اور ان کے بنیادی حقوق کے تحفظ کے لیے مناسب تحقیقات کی جائیں گی، جبکہ حکومتِ پاکستان کی جانب سے موصول ہونے والی کسی بھی معلومات سے جے کے ایچ آر او کو آگاہ رکھا جائے گا۔

اقوامِ متحدہ کو جمع کرائی گئی تفصیلات کے مطابق، مظفرآباد کے رہائشی شوکت نواز میر کو اس وقت حراست میں لے کر نامعلوم مقام پر منتقل کیا گیا جب وہ راولاکوٹ میں جاری دھرنے کی جانب سفر کر رہے تھے۔ آزاد جموں و کشمیر ہائی کورٹ میں دائر حبسِ بے جا کی درخواست کے باوجود، سماعتوں کے دوران انہیں عدالت کے روبرو پیش نہیں کیا گیا۔ جے کے ایچ آر او کے مطابق 12 نومبر 2026 تک شوکت نواز میر کو کسی بھی عدالت میں پیش نہیں کیا گیا اور ان کی جسمانی حالت، مقامِ حراست اور قانونی حیثیت بدستور صیغۂ راز میں ہے۔

جے کے ایچ آر او کے ترجمان نے اس پیش رفت پر ردعمل دیتے ہوئے کہا کہ اقوامِ متحدہ کے ورکنگ گروپ کی فوری مداخلت ایک انتہائی اہم قدم ہے۔ ترجمان کے مطابق، "پاکستان کو شفاف انداز میں جواب دینا، شوکت نواز میر کی قسمت اور مقامِ موجودگی کا تعین کرنا اور انہیں فوری طور پر کسی بااختیار عدالت میں پیش کرنا چاہیے۔ مقامِ موجودگی ظاہر کیے بغیر اور عدالتی نگرانی سے محروم ہر اضافی دن ان کی سلامتی سے متعلق خدشات کو بڑھا رہا ہے اور خفیہ حراست کے خلاف بنیادی قانونی ضمانتوں کو کمزور کر رہا ہے۔”

تنظیم نے فوری اقدامات کا مطالبہ کرتے ہوئے زور دیا ہے کہ شوکت نواز میر کا مقامِ موجودگی فوری ظاہر کر کے انہیں عدالت میں پیش کیا جائے، ان کے اہلِ خانہ اور وکلاء کو ان تک فوری رسائی دی جائے، گرفتاری و حراست کی قانونی بنیاد اور تمام ریکارڈ سامنے لائے جائیں، ان کی جسمانی و نفسیاتی سلامتی کو یقینی بنایا جائے اور جبری گمشدگی کے حالات کی آزادانہ و مؤثر تحقیقات کرائی جائیں۔

جے کے ایچ آر او نے واضح کیا ہے کہ اقوامِ متحدہ کی یہ مداخلت اگرچہ ذمہ داری کے تعین کا حتمی عدالتی فیصلہ نہیں، تاہم اس کے ذریعے مقدمہ باضابطہ طور پر حکومتِ پاکستان کے سامنے رکھا گیا ہے اور قابلِ اعتماد جواب کا تقاضا کیا گیا ہے۔ تنظیم نے اعادہ کیا کہ وہ اقوامِ متحدہ کے متعلقہ اداروں کے ساتھ مسلسل رابطے میں رہے گی اور حکام کے جواب کی نگرانی جاری رکھے گی۔