پاکستان کے زیر قبضہ بلوچستان کے سرحدی ضلع چاغی میں ایک ٹریفک کے حادثے میں 9 افغان شہری سمیت 10 افراد ہلاک اور 11 زخمی ہو گئے۔
حکام کے مطابق، غیر قانونی طور پر بلوچستان سے ایران جانے کی کوشش کرنے والے ان افغان شہریوں کی گاڑی کو ضلع کے علاقے نوکنڈی میں حادثہ پیش آیا۔
ایس ایس پی چاغی محمد شریف کلہوڑو نے بتایا کہ 21 افغان شہری ایک زمیاد گاڑی میں سفر کر رہے تھے جب ان کی گاڑی نوکنڈی کے قریب ایک آئل ٹینکر سے ٹکرا گئی۔ ’زمیاد‘ یا ’زمباد‘ نیلے پِک اپ ٹرک ہوتے ہیں جنھیں ایران اور بلوچستان کے درمیان پیٹرول اور ڈیزل کی سمنگلنگ کے لیے استعمال کیا جاتا ہے۔
انھوں نے بتایا کہ حادثے کے نتیجے میں کم از کم 9 افغان شہری اور ایک مقامی ڈرائیور ہلاک اور 11 زخمی ہو گئے۔
ایس ایس پی کلہوڑو کا کہنا تھا کہ زخمیوں کو طبی امداد کے لیے مقامی ہسپتال منتقل کیا گیا جبکہ بعد ازاں ہلاک ہونے والے افراد کی لاشوں کو افغانستان بھیج دیا گیا۔
ان کا کہنا تھا کہ اس سلسلے میں تحقیقات کا آغاز کردیا گیا ہے۔
پولیس کے مطابق، ابتدائی تحقیق سے یہ بات سامنے آئی کہ حادثے کا شکار ہونے والے افراد بلوچستان میں غیر قانونی طور پر داخل ہوئے تھے اور وہ یہاں سے ایران کے راستے یوروپی ممالک جانا چاہتے تھے۔
ایس ایس پی کلہوڑو کا کہنا تھا کہ ان افراد کو غیر قانونی طور پر لانے میں انسانی اسمگلروں کا منظم گروہ ملوث ہے جس کا پتہ لگانے اور اس کے خلاف کاروائی کے لیے کوششوں کا آغاز کردیا گیا ہے۔
Share this content:
