جموں کشمیر پیپلز نیشنل پارٹی کی قیادت کے بینک اکاؤنٹس منجمد، شناختی کارڈ اور موبائل سمز بلاک کر دیے گئے

باغ/مظفرآباد ( کاشگل نیوز)

پاکستان زیرِ انتظام جموں و کشمیر میں سیاسی کارکنوں کے خلاف کارروائیوں کا سلسلہ جاری ہے۔

ذرائع کے مطابق جموں کشمیر پیپلز نیشنل پارٹی کے مرکزی چیئرمین واجد علی واجد ایڈووکیٹ، سیکریٹری جنرل الیاس کشمیری، سابق چیئرمین ذوالفقار ایڈووکیٹ، کرن کنول، شہزاد حسرت، سلمہ حمید سمیت متعدد رہنماؤں اور کارکنوں کی موبائل سمز بلاک کر دی گئی ہیں، جبکہ ان کے بینک اکاؤنٹس منجمد اور شناختی کارڈ بھی بلاک کر دئیے گے۔

ذرائع کے مطابق ان اقدامات کے باعث متاثرہ رہنماؤں اور کارکنوں کو روزمرہ معاملات، مالی لین دین اور مواصلاتی سہولیات میں شدید مشکلات کا سامنا ہے۔ تاہم متعلقہ حکام کی جانب سے ان کارروائیوں کی وجوہات یا قانونی بنیاد کے حوالے سے تاحال کوئی باضابطہ مؤقف سامنے نہیں آیا۔

دوسری جانب ضلع باغ میں قائم معروف کیمون لائبریری کو بھی سیل کر دیا گیاہے۔

مقامی حلقوں نے اس اقدام پر تشویش کا اظہار کرتے ہوئے کہا ہے کہ تعلیمی و علمی مراکز کو بند کرنے کے فیصلے سے طلبہ، محققین اور عام قارئین متاثر ہوں گے۔

واضح رہے کہ حالیہ دنوں میں جموں و کشمیر میں مختلف سیاسی و سماجی حلقوں کے خلاف انتظامی اقدامات کی اطلاعات سامنے آتی رہی ہیں، جس کے باعث سیاسی سرگرمیوں اور شہری آزادیوں کے حوالے سے نئی بحث چھڑ گئی ہے۔