دنیا بدل رہی ہے، اور اس تبدیلی میں وہ معاشرے نمایاں ہیں جو اپنی مقامی صلاحیتوں کو عالمی مکالمے سے جوڑنے کی اہلیت رکھتے ہیں۔ ایسے ہی وقت میں کشمیر ڈیولپمنٹ فاؤنڈیشن (KDF) کو اقوامِ متحدہ کی جنرل اسمبلی کی جانب سے دوحہ میں ہونے والے ’’سماجی ترقی کے دوسرے عالمی سربراہی اجلاس‘‘ میں شرکت کے لیے خصوصی دعوت دی گئی ہے۔
یہ دعوت کسی ایک ادارے کی کامیابی نہیں بلکہ پورے کشمیری معاشرے کے لیے ایک اعتراف ہے۔ ایک ایسا اعتراف کہ یہاں کے لوگ اپنے مسائل کے حل میں خود شریک ہونا چاہتے ہیں، اور دنیا کے ساتھ اپنے تجربات بانٹنے کی صلاحیت رکھتے ہیں۔سماجی ترقی کے اس عالمی اجلاس کا مقصد غربت کے خاتمے، باعزت روزگار کی فراہمی اور سماجی ہم آہنگی کو فروغ دینا ہے۔ ایسے موقع پر KDF کی نمائندگی اس بات کا ثبوت ہے کہ کشمیر میں سول سوسائٹی انسانی ترقی کے عالمی مکالمے کا حصہ بننے کے لیے تیار ہے۔
خطے میں جہاں معاشرتی چیلنجز شدید ہیں، وہاں استقامت، کمیونٹی کی شمولیت اور خود انحصاری کی مثالیں بھی بھرپور انداز میں موجود ہیں۔ KDF کی شرکت اس بات کی علامت ہے کہ اب کشمیر کی آواز صرف سیاسی حوالوں تک محدود نہیں بلکہ انسانی ترقی، سماجی انصاف اور روزگار کے مواقع جیسے عالمی موضوعات سے جڑ رہی ہے۔
یہ دعوت اس تصور کو مضبوط بناتی ہے کہ پائیدار ترقی صرف حکومتی پالیسیوں سے ممکن نہیں بلکہ مقامی سطح پر منصفانہ شرکت، علم اور شفافیت کے امتزاج سے ہی حاصل کی جا سکتی ہے۔ کشمیر ڈیولپمنٹ فاؤنڈیشن کئی دہائیوں سے صحت سے آگاہی، نوجوانوں کے بااختیار بننے، کمیونٹی کے استحکام اور انسانی امداد کے منصوبوں پر کام کر رہی ہے۔
اب ان تجربات کو عالمی فورمز پر پیش کرنے سے نہ صرف خطے کی ساکھ میں اضافہ ہوگا بلکہ دیگر ممالک بھی ان کمیونٹی ماڈلز سے استفادہ کر سکیں گے۔اہم بات یہ ہے کہ KDF جیسے ادارے ایک نئی قسم کی شراکت داری کو فروغ دے رہے ہیں۔ ایسی شراکت داری جو حکومت، سول سوسائٹی، نجی شعبے اور بین الاقوامی اداروں کے درمیان اعتماد، شفافیت اور مشترکہ ذمہ داری پر مبنی ہے۔
یہ تعلقات مقامی سطح پر ہونے والے چھوٹے لیکن مؤثر اقدامات کو عالمی پالیسیوں سے جوڑ سکتے ہیں۔ یہی راستہ حقیقی ترقی اور سماجی انصاف کی بنیاد فراہم کرتا ہے۔کشمیر میں نوجوان ،آبادی میں ایک زبردست اثاثہ ہے۔ KDF کے پروگرام نوجوانوں کو مستقبل کے لیے تیار کرنے، ہنر مند بنانے اور فیصلہ سازی میں شامل کرنے کا راستہ فراہم کرتے ہیں۔
عالمی سطح پر شرکت کے یہ مواقع اس یقین کو تقویت دیتے ہیں کہ نوجوان صرف سامع نہیں بلکہ حل کے خالق بھی ہو سکتے ہیں۔کشمیر ڈیولپمنٹ فاؤنڈیشن کو اقوامِ متحدہ کی طرف سے ملنے والی دعوت اس بات کی علامت ہے کہ اگر کسی خطے کے لوگ علم، عزم اور تعاون کے ساتھ آگے بڑھیں تو دنیا ان کی بات سننے کو تیار ہے۔
دوحہ میں ہونے والا یہ سربراہی اجلاس محض ایک عالمی تقریب نہیں بلکہ ایک موقع ہے کہ کشمیر ڈیولپمنٹ فاؤنڈیشن کے ذریعے کشمیر اپنی کہانی خود سنائے۔ امن، ترقی اور انسانی وقار کی کہانی۔ اور یقیناً KDF کا وفد یہ کام خوب کریگا اور یہیں سے کشمیر میں سماجی ترقی کا ایک نیا باب کھلے گا۔
Share this content:
