جموں کشمیر کے ضلع ڈوڈہ میں شدت پسندوں کے خلاف آپریشن کے لیے جانے والی انڈین فوج کی گاڑی کو پیش آنے والے حادثے کے نتیجے میں 10 فوجی ہلاک اور متعدد زخمی ہو گئے ہیں۔
جموں کشمیر کے لیفٹیننٹ گورنر منہوج سنہا نے ہلاکتوں کی تصدیق کرتے ہوئے اموات پر افسوس کا اظہار اور اسے قومی نقصان قرار دیا ہے۔
انڈین فوج کی وائٹ نائٹ کور نے ایکس پر جاری بیان میں کہا کہ آپریشن کے لیے جارہی فوج کی ایک گاڑی خراب موسم کے دوران نہایت دشوار گزار پہاڑی راستے سے گزر رہی تھی، جب وہ سڑک سے پھسل کر کھائی میں جا گری۔ زخمیوں کو ہیلی کاپتر کے ذریعے ہسپتال منتقل کیا گیا ہے۔
فوج کے مطابق یہ حادثہ کشمیر اور انڈیا کی شمالی ریاست ہماچل پردیش کی سرحد پر ہوا۔ بلند پہاڑیوں پر انڈین فوجی ٹھکانوں تک رسائی کے لیے اسی شاہراہ کو استعمال کیا جاتا ہے۔
ڈوڈہ کے پڑوسی ضلع کشتواڑ میں گذشتہ کئی روز سے مسلح شدت پسندوں کے خلاف فوجی آپریشن جاری ہے۔ چند روز قبل شدت پسندوں نے محاصرہ کرنے والی فوجی پارٹی پر فائرنگ کی جس کے نتیجے میں پولیس کے سپیشل آپریشنز گروپ کا ایک اہلکار ہلاک ہو گیا تھا۔
فوج کا کہنا ہے کہ حملہ آور گھنے جنگلات اور پہاڑی درّوں کا فائدہ اُٹھاتے ہوئے بھاگنے میں کامیاب ہوگئے تاہم ان کی تلاش کے لئے وسیع آپریشن شروع کیا گیا۔
۔۔۔۔۔۔۔
Share this content:
