پاکستان کے صوبہ بلوچستان میں گزشتہ 24 گھنٹوں کے دوران قلات اور کیچ اضلاع میں فرنٹیئر کور اور لیویز کی چیک پوسٹوں پر مسلح حملوں میں 4 سیکیورٹی اہلکار ہلاک اور 8 زخمی ہوگئے۔
ایک واقعے میں نوشکی کے ایک پولیس اسٹیشن پر بھی حملہ کیا گیا، حکام کا کہنا ہے کہ لیویز چیک پوسٹ کو اتوار کی علی الصبح توگھو چھپیئر کے علاقے میں نشانہ بنایا گیا۔
بلوچستان حکومت کے ترجمان شاہد رعد نے بتایا کہ نامعلوم افراد نے چوکی پر فائرنگ کی، لیویز اہلکاروں نے جوابی فائرنگ کی، فائرنگ کا تبادلہ کچھ دیر تک جاری رہا جس کے بعد حملہ آور فرار ہوگئے۔
انہوں نے کہا کہ فائرنگ کے نتیجے میں ایک لیویز اہلکار ہلاک جب کہ 2 شدید زخمی ہوگئے، حملے کی اطلاع ملتے ہی لیویز فورسز موقع پر پہنچ گئیں اور لاش اور زخمیوں کو قلات کے ضلعی ہسپتال منتقل کردیا۔
ہلاک اہلکار کی شناخت علی نواز لانگو کے نام سے ہوئی جب کہ زخمیوں میں غلام علی اور محمد ایوب لانگو شامل ہیں، حکام کا کہنا ہے کہ حملہ آوروں کی تلاش کے لیے علاقے میں آپریشن جاری ہے۔
دوسری جانب ضلع کیچ میں نامعلوم مسلح افراد نے ہفتے کی رات دیر گئے نیم فوجی فرنٹیئر کور کی ایک چیک پوسٹ پر حملہ کیا، حکام کا کہنا ہے کہ چوکی پر تعینات ایف سی اہلکاروں نے حملہ آوروں کو نشانہ بنایا، شدید فائرنگ کے تبادلے کے دوران 3 جوان ہلاک اور 6 دیگر زخمی ہوگئے۔
زخمیوں اور لاشوں کو ہسپتال منتقل کردیا گیا جہاں ہلاک ایف سی اہلکاروں کی شناخت نائیک گل سنت، لانس نائیک رانا ذاکر اور سپاہی لکھمیر کے ناموں سے ہوئی ہے۔
بعد ازاں تمام زخمیوں کو علاج کے لیے کوئٹہ منتقل کردیا گیا، سپاہی لکھمیر کا تعلق بلوچستان کے علاقے نصیر آباد سے تھا۔
حملے کے بعد ایف سی کے مزید دستے علاقے میں پہنچ گئے اور سرچ آپریشن شروع کر دیا گیا۔
اطلاعات کے مطابق عسکریت پسندوں نے ہفتے کی رات نوشکی کے علاقے میں ایک پولیس اسٹیشن اور لیویز فورسز کے اسٹیشن پر بھی حملہ کرنے کی کوشش کی، تاہم دونوں مقامات پر موجود اہلکاروں نے مزاحمت کی اور دونوں عمارتوں میں داخل ہونے کی ان کی کوششوں کو ناکام بنا دیا۔
اتوار کی شام نامعلوم موٹر سائیکل سواروں نے نوشکی میں ایک پولیس اسٹیشن پر دستی بم پھینکا، حکام نے بتایا کہ ڈیوائس عمارت کے قریب پھٹ گئی۔
ذرائع کا کہنا ہے کہ مسلح افراد نے فائرنگ بھی کی جس کا پولیس اہلکاروں نے بھرپور جواب دیا، جس کے بعد حملہ آور فرار ہونے پر مجبور ہوگئے۔
واقعے میں کوئی جانی نقصان نہیں ہوا تاہم دھماکے کے نتیجے میں تھانے کی ایک دیوار کو معمولی نقصان پہنچا ہے۔
