بلوچستان کے ضلع مستونگ میں نامعلوم مسلح افراد نے تحصیل کے دفتر اور بینکوں پر حملہ کیا ہے۔
پولیس حکام کے مطابق ان حملوں میں اب تک کم از کم ایک بچہ ہلاک اور پانچ افراد زخمی ہوئے ہیں۔
ڈی ایس پی مستونگ محمد یونس مگسی نے بتایا کہ ’مسلح حملہ آوروں نے پہلے مستونگ شہر میں تحصیل آفس پر حملہ کیا ہے۔‘
انھوں نے بتایا کہ ’اس حملے کے بعد پولیس اہلکار پہنچے اور حملہ آوروں کے ساتھ مقابلہ ہوا۔‘
ان کا کہنا تھا کہ ’اس مقابلے کے بعد حملہ آور تحصیل آفس سے نکل کر ایک بینک میں داخل ہوئے جہاں پولیس اہلکاروں کے پہنچنے کے بعد انھوں نے راکٹ فائر کیے۔‘
ڈی ایس پی کا کہنا تھاُ کہ ’ایف سی کی نفری بھی شہر میں پہنچ گئی ہے اور سکیورٹی فورسز اور پولیس اہلکاروں کا مسلح افراد کے ساتھ مقابلہ جاری ہے۔‘
انھوں نے بتایا کہ ’اس وقت جانی اور مالی نقصانات کا اندازہ لگانا مشکل ہے تاہم اب تک ایک بچے کی ہلاکت کے علاوہ پانچ افراد کے زخمی ہونے کی تصدیق ہوئی ہے۔‘
ان کا کہنا تھا کہ ’زخمیوں کو طبی امداد کی فراہمی کے لیے ہسپتال منتقل کیا گیا ہے۔
دوسری جانب سرکاری حکام کے مطابق مستونگ کے ہسپتالوں میں ایمر جنسی نافذ کردی گئی ہے۔
مسلح افراد کے حملے کے بعد شہر میں شدید خوف و ہراس پھیل گیا ہے اور شہر کے مرکزی علاقے خالی ہوگئے ہیں۔
حکومتِ بلوچستان نے دعویٰ کیا ہے کہ بلوچستان کے ضلع مستونگ میں سرکاری عمارت اور بینکوں پر حملہ آور ہونے والے مسلح افراد کے خلاف کارروائی جاری ہے اور سکیورٹی فورسز کے ساتھ مقابلے میں کم از کم 2 حملہ آورہلاک کر دیے گئے ہیں۔
حکومت بلوچستان کے ترجمان شاہد رند کے مطابق حملہ آوروں کے اس حملے میں ایک 16 سالہ بچہ ہلاک جبکہ سات افراد زخمی ہوئے ہیں۔
ترجمان کے مطابق 3 حملہ آور زخمی بھی ہوئے ہیں۔
ترجمان کا مزید کہنا ہے کہ متاثرہ علاقے میں مسلح افراد کے خلاف آپریشن جاری ہے اور واقعے کے فوراً بعد ایف سی، سی ٹی ڈی اور لیویز اہلکاروں نے علاقے کا محاصرہ کر لیا جس کی وجہ سے دہشت گرد پسپا ہو گئے۔
ترجمان نے مزید بتایا کہ ’سکیورٹی فورسز نے مسلح افراد کو گھیرے میں لے لیا جس کے نتیجے میں فائرنگ کا شدید تبادلہ ہوا اور 2 حملہ آور مارے گئے جبکہ تین زخمی ہوئے۔‘
اُن کا مزید کہنا ہے کہ ’سکیورٹی اداروں نے حملہ آوروں کے سہولت کاروں کی تلاش بھی شروع کر دی ہے۔‘
Share this content:
