بلوچستان کے ضلع مستونگ کی تحصیل دشت میں بدھ کی شام نامعلوم مسلح افراد نےتعمیراتی کمپنی سے تعلق رکھنے والے 9 افراد کو اغوا کر لیا۔جبکہ نوشکی سے لاپتہ ہونے والے پولیس آفیسر ایس ڈی پی او نوشکی محمد یوسف ریکی کی نعش مستونگ سے برآمد ہوئی ہے۔
مستونگ سے مسلح افراد کے ہاتھوں اغوا ہونے والے افراد علاقے میں ایک زیر تعمیر عمارت پر کام کر رہے تھے جن کے بارے میں کہا جارہا ہے کہ وہ پاکستانی فوج کا ایک چیک پوسٹ تھا۔
اغوا ہونے والے افراد کا تعلق پنجاب اور سندھ کے مختلف علاقوں سے بتایا جارہا ہے۔
واقعے کے بعد پاکستانی فورسز کی بھاری نفری نے علاقے میں سرچ آپریشن کا آغاز کردیا ہے۔
پولیس حکام کے مطابق مذکورہ افراد ایک سرکاری منصوبے پر کام کر رہے تھے، جہاں مسلح افراد نے گھیراؤ کر کے انھیں تحویل میں لینے کے بعد نامعلوم مقام پر منتقل کردیا۔
تاہم حکام نے واقعے میں ملوث اغواکاروں کے حوالے سے تاحال کوئی تفصیلات فراہم نہیں کی ہیں۔اور نہ ہی اب تک کسی تنظیم نے اس واقعہ کی ذمہ داری قبول کرلی۔
دوسری جانب بلوچستان کے علاقے نوشکی کے سینیئر پولیس آفیسر ایس ڈی پی او نوشکی محمد یوسف ریکی جو کہ گزشتہ تین روز سے لاپتہ تھے کی لاش مستونگ کے کردگاپ کے علاقے کلی شربت خان سے برآمد ہوئی ہے۔
علاقے کے لیویز انچارج غلام سرور نے بتایا کہ لاش چند گھنٹے پرانی معلوم ہوتی ہے اور مقتول کو سر اور جسم کے مختلف حصوں میں گولیاں ماری گئی ہیں۔
انہوں نے مزید بتایا کہ لاش کو قانونی کارروائی کے لیے کوئٹہ منتقل کیا جا رہا ہے۔
نوشکی پولیس کے سربراہ ایس پی اللہ بخش کے مطابق مقتول ڈی ایس پی محمد یوسف ریکی نوشکی میں بطور سب ڈویژنل پولیس افسر (ایس ڈی پی او) تعینات تھے۔ انہیں پانچ روز قبل سنیچر اور اتوار کی درمیانی شب نوشکی سے سوراب اپنے گھر جاتے ہوئے مستونگ کے علاقے کردگاپ کے قریب نامعلوم مسلح افراد نے گاڑی سمیت اغوا کرلیا تھا۔
پولیس کے مطابق اغوا سے چند لمحے قبل محمد یوسف ریکی نے اپنی اہلیہ کو فون کرکے بتایا تھا کہ انہیں مسلح افراد نے روک لیا ہے۔ اس کے بعد ان سے رابطہ منقطع ہوگیا۔
ابتدائی تحقیقات کے مطابق وہ کسی محافظ کے بغیر اکیلے نیشنل ہائی وے کی بجائے نسبتاً غیر آباد اور پہاڑی مگر مختصر راستے سے سفر کر رہے تھے۔ ان کی گاڑی تاحال نہیں ملی۔
پولیس حکام کا کہنا ہے کہ اغوا اور قتل کی وجوہات فی الحال معلوم نہیں ہوسکیں۔
Share this content:
