پاکستان تحریکِ انصاف (پی ٹی آئی) نے دعویٰ کیا ہے کہ خیبر پختونخوا کے دو صوبائی وزرا کے گھروں پر چھاپے مارے گئے اور رکنِ قومی اسمبلی محمد زبیر خان وزیر کو گرفتار کیا گیا ہے۔
سوشل میڈیا پلیٹ فارم ایکس پر پاکستان تحریکِ انصاف کی جانب سے جاری بیان میں کہا گیا ہے کہ گذشتہ رات وزیر برائے ایکسائز، ٹیکسیشن اینڈ نارکوٹکس کنٹرول سید فخر جہاں کی رہائش گاہ پر چھاپہ مارا گیا۔ ایک الگ کارروائی میں پولیس کی بھاری نفری نے بونیر میں وزیر آبپاشی ریاض خان کے گھر پر بھی چھاپہ مارا۔
پی ٹی آئی کے مطابق نا معلوم افراد نے حلقہ این اے 42 جنوبی وزیرستان سے رکنِ قومی اسمبلی محمد زبیر خان وزیر کے گھر کا کئی گھنٹوں تک محاصرہ کیے رکھا۔ بیان میں دعویٰ کیا گیا ہے کہ گھر میں موجود اہلِ خانہ کو یرغمال بنایا گیا۔
بیان کے مطابق بعد ازاں زبیر خان وزیر کی رہائش گاہ پر ایک اور چھاپہ مارا پولیس کی بھاری نفری نے مارا اور فائرنگ کے تبادلے کے بعد انھیں گرفتار کر لیا۔
ایکس پر پوسٹ میں پاکستان تحریکِ انصاف نے مطالبہ کیا ہے کہ ’ان چھاپوں میں ملوث تمام پولیس اہلکاروں کی فوری نشاندہی کر کے ان کے خلاف کارروائی کی جائے۔‘
پارٹی نے صوبائی حکومت سے مطالبہ کیا کہ حقائق جاننے، ذمہ دار افراد کا تعین کرنے اور ان کے خلاف قانونی کارروائی کے لیے غیر جانب دار تحقیقات کرائی جائیں۔
بیان میں مزید کہا گیا ہے کہ ’متعلقہ حکام متاثرہ نمائندوں کے اہلِ خانہ کی سلامتی، وقار اور فلاح و بہبود کو فوری طور پر یقینی بنائیں۔‘
Share this content:
