جموں کشمیر پیپلز نیشنل پارٹی نے پاکستان بھارت کشیدگی کو کشمیری عوام کے لیے تشویشناک قرار دیدیا ہے۔
اس سلسلے میں کیلگری کینیڈا جموں کشمیر پیپلز نیشنل پارٹی (کینیڈا برانچ) کے سیکریٹری جنرل شعیب خان نے بھارت اور پاکستان کے درمیان بڑھتی ہوئی کشیدگی پر گہری تشویش کا اظہار کرتے ہوئے کہا کہ دونوں ممالک کی دشمنی جموں و کشمیر کے عوام کے لیے شدید نقصان دہ ہے۔
انہوں نے کہا، "یہ جنگ ہماری نہیں ہے۔ یہ ایک منظم قتل عام کا منصوبہ ہے، جس میں کشمیری عوام کو ایندھن کے طور پر استعمال کیا جا رہا ہے۔ آزاد جموں و کشمیر کے عوام کسی صورت اس تباہ کن منصوبے کا حصہ نہیں بن سکتے۔”
شعیب خان نے مزید کہا کہ دہائیوں سے کشمیری عوام پاک بھارت تنازع کے درمیان پس رہے ہیں اور یہ سلسلہ اب بند ہونا چاہیے۔ "ہمیں بار بار جنگ کا ایندھن بنایا جا رہا ہے، جبکہ ہمارا مطالبہ صرف امن، خود ارادیت اور باعزت زندگی ہے — نہ کہ گولیاں، بارود اور لاشیں۔”
انہوں نے بھارت اور پاکستان کی حکومتوں پر زور دیا کہ وہ کشیدگی کو ہوا دینے کے بجائے فوری اور بامقصد مذاکرات کا آغاز کریں۔ ساتھ ہی، انہوں نے اقوام متحدہ، انسانی حقوق کی تنظیموں، اور عالمی برادری سے اپیل کی کہ وہ مداخلت کریں اور مسئلہ کشمیر کا ایسا حل نکالیں جو کشمیری عوام کی خواہشات اور حقوق کے مطابق ہو۔
ان کا کہنا تھا کہ "دنیا کو سمجھنا ہوگا کہ کشمیر کوئی جنگی میدان نہیں بلکہ ہمارا گھر ہے۔ ہمیں سیاسی نعروں کے بجائے حقیقی عالمی یکجہتی کی ضرورت ہے تاکہ مستقل امن کا راستہ ہموار کیا جا سکے،”
شعیب خان نے کہا کہ جموں کشمیر پیپلز نیشنل پارٹی (JKPNP) ایک ترقی پسند، جمہوری سیاسی جماعت ہے جو ریاست جموں و کشمیر کے عوام کے حق خود ارادیت، انسانی حقوق اور سماجی انصاف کے لیے جدوجہد کر رہی ہے۔ پارٹی کی کینیڈا شاخ بین الاقوامی سطح پر کشمیری عوام کے مسائل کو اجاگر کرنے میں سرگرم ہے۔
Post Comment