مظفرآباد / کاشگل نیوز
پاکستان کے زیر انتظام مقبوضہ جموں و کشمیر میں جوائنٹ عوامی ایکشن کمیٹی کے عوامی قافلوں پر پاکستانی فورسز ایف سی اور پولیس کی فائرنگ سے مزید 8 نوجوانوں کی ہلاکت اور متعدد کی زخمی ہونے کی اطلاعات ہیں ۔
ذرائع کا کہنا ہے کہ باغ سے مظفرآباد کی جانب مارچ کرنے والے قافلے پر دھیرکوٹ چمیاٹی کے مقام پہ ایف سی نے فائر کھول دیا ۔ جس کے نتیجے میں 4 نوجوان ہلاک جبکہ متعدد زخمی ہوگئے۔
جبکہ مظفرآباد میں نہتے مظاہرین پر فورسز کی فائرنگ سے 3 افراد ہلاک ہوگئے۔
اسی طرح میرپور ڈڈیال میں بھی جوائنٹ عوامی ایکشن کمیٹی کے اجتماع پر فائر نگ گئی جس سے ایک نوجوان ہلاک ہوگیا۔
ہلاک ہونے والے ایک نوجوان کا تعلق میرپورپلاک ڈڈیال جرائی سے جبکہ 4 کی دھیر کوٹ سے بتایا جارہاہے۔
انٹرنیٹ سروسز بند ہونے کی وجہ سے مختلف علاقوں سے خبروں تک رسائی میں دشواری پیش آرہی ہے ۔
مظاہرین کا کہنا ہے کہ ریاستی تشدد سے عوام کی آواز کو نہ دبایا جا سکتا ہے نہ روکا جا سکتا ہے۔
جموں کشمیر بھر کے مختلف علاقوں سے عوامی ایکشن کمیٹی کے قافلے دارلحکومت مظفرآباد کی جانب رواں دواں جہاں انہیں ریاست کی جانب سے کھڑی کی گئیں رکاوٹوں کا سامناہے جو مختلف علاقوں کے انٹری پوائنٹ پر کنٹینرز کی صورت میں موجود ہیں جبکہ فورسز کی بڑی نفری بھی تعینات ہے جوقافلوں پر آنسو گیس اور فائرنگ کے ذریعے روکنے کی کوشش کر رہی ہے۔
ذرائع کا کہنا ہے کہ عوام رکاوٹیں عبور کرکے آگے بڑھ رہے ہیں۔
Share this content:
