پاکستان کے زیر انتظام گلگت بلتستان میں گلگت بلتستان یونائیٹڈ موومنٹ (GBUM) کے سربراہ شبیر مایار نے ریاستی جبر، نقل و حرکت پر پابندی اور علاج کی عدم فراہمی کے خلاف قوم کے نام ایک کھلا خط جاری کیا ہے، جس میں انہوں نے اپنی صحت، سیاسی سرگرمیوں اور حکومتی رویے سے متعلق سنگین خدشات کا اظہار کیا ہے۔
خط میں شبیر مایار نے کہا کہ گلگت بلتستان ایک ایسا خطہ ہے جو دہائیوں سے سیاسی، آئینی اور انسانی حقوق کے بحران کا شکار ہے، اور یہاں کے شہریوں کی زندگی ریاستی مشینری کے ہاتھوں غیر محفوظ ہو چکی ہے۔ ان کے مطابق اس نیم نوآبادیاتی نظام میں اختیار اور جواب دہی کا توازن بری طرح بگڑ چکا ہے۔
شبیر مایار نے بتایا کہ وہ 2018 سے دل کے عارضے میں مبتلا ہیں اور بلتستان کے ڈاکٹروں نے انہیں بہتر علاج کے لیے پاکستان ریفر کیا ہے، مگر سرکاری ادارے انہیں سفر کی اجازت دینے سے مسلسل انکار کر رہے ہیں۔ ان کے مطابق:
- گزشتہ دو سال سے انہیں شیڈول فورتھ کے تحت اپنے ہی گاؤں تک محدود کر دیا گیا ہے۔
- نو سال سے ان کا نام شیڈول فورتھ میں شامل ہے۔
- اس عرصے میں انہیں متعدد بار گرفتار کیا گیا اور دو سال سے عملی طور پر نظر بندی کی کیفیت میں رکھا گیا ہے۔
انہوں نے اسے انتظامی نہیں بلکہ "سیاسی سزا” قرار دیا۔
اپنے خط میں شبیر مایار نے کئی بنیادی سوالات اٹھائے، جن میں یہ بھی شامل ہے کہ کیا ایک مظلوم قومیت سے تعلق رکھنا جرم ہے اور کیا سیاسی اختلاف اتنا بڑا خطرہ ہے کہ ایک بیمار شخص کے علاج تک کو روک دیا جائے۔
انہوں نے کہا کہ ریاستی ادارے علاج جیسے بنیادی انسانی حق کو بھی سیاسی کنٹرول کے ہتھیار کے طور پر استعمال کر رہے ہیں، جو اجتماعی سزا کی ایک شکل ہے۔
شبیر مایار نے اقوام متحدہ، عالمی انسانی حقوق کی تنظیموں اور دنیا بھر کے انصاف پسند افراد سے اپیل کی کہ وہ ان کے معاملے کا نوٹس لیں، کیونکہ زندگی کا حق، علاج کا حق اور آزادانہ نقل و حرکت کا حق بین الاقوامی سطح پر تسلیم شدہ بنیادی انسانی حقوق ہیں، جن پر پابندی کسی بھی ریاست کے لیے اخلاقی طور پر قابلِ جواز نہیں۔
"خاموشی ظلم کے استحکام کا باعث بنتی ہے”
خط کے اختتام پر انہوں نے کہا کہ ایک مظلوم قومیت کے فرد کو بیماری کے ساتھ ساتھ ریاستی جبر سے لڑنے پر مجبور نہ کیا جائے، کیونکہ خاموشی ظلم کو مضبوط کرتی ہے جبکہ آواز اٹھانا تاریخ کے سامنے ذمہ داری ادا کرنے کے مترادف ہے۔
Share this content:
