ایران کے شمال مغربی شہر تبریز میں امریکی اور اسرائیلی فضائی حملوں کے نتیجے میں چھ افراد ہلاک اور چھ زخمی ہو گئے ہیں۔
ایرانی صوبے مشرقی آذربائیجان کے ڈائریکٹر جنرل آف ڈیزاسٹر مینجمنٹ مجید فرشی کے مطابق آج صبح ہونے والے حملوں میں نصر ٹاؤن کی ایک رہائشی عمارت کو نشانہ بنایا گیا، جہاں چار افراد ہلاک اور چھ زخمی ہوئے۔ ان کے مطابق رشیدی کوارٹر کے ایک پارک پر ہونے والے ایک اور حملے میں دو افراد جان سے گئے۔
تبریز میں صبح سویرے متعدد دھماکوں کی آوازیں سنی گئیں، جبکہ بسیج سے منسلک دانشجو نیوز ایجنسی نے تباہ شدہ رہائشی عمارت کی تصاویر بھی جاری کی ہیں۔
دوسری جانب ایران کے پاسدارانِ انقلاب نے دعویٰ کیا ہے کہ اس نے اسرائیل کے شمالی، وسطی اور جنوبی علاقوں کے علاوہ تین امریکی فوجی اڈوں کو بھی نشانہ بنایا ہے۔ پاسدارانِ انقلاب سے وابستہ تسنیم نیوز ایجنسی کے مطابق حملوں میں ڈرونز کا استعمال کیا گیا۔
ایرانی دعوے کے مطابق نشانہ بنائے گئے امریکی فوجی اڈوں میں علی السالم بیس (کویت)، الخرج بیس (سعودی عرب) اور الظفرہ فوجی اڈہ (متحدہ عرب امارات) شامل ہیں۔
تاحال اسرائیلی فوج، کویت، سعودی عرب یا متحدہ عرب امارات کی جانب سے ان حملوں کی آزادانہ تصدیق نہیں کی گئی۔
تبریز پر حملوں اور ایران کے جوابی دعوؤں کے بعد خطے میں کشیدگی مزید بڑھ گئی ہے، جبکہ مختلف ممالک کی جانب سے صورتحال پر گہری نظر رکھی جا رہی ہے۔
Share this content:
